3 Desember 2015 14:40
Í liðinni viku hafði lögreglan á Vestfjörðum afskipti af einum ökumanni sem reyndist vera undir áhrifum áfengis. Það var um miðjan dag á Ísafirði þann 24. nóvember. Þá stöðvaði lögreglan annan ökumann sem grunaður er um akstur undir áhrifum fíkniefna. Það var þann 26. nóvember í Vesturbyggð.
Tveir ökumenn voru kærðir fyrir að aka yfir leyfilegum hámarkshraða, annar í Strandasýslu enn hinn á Ísafirði.
Tvær tilkynningar bárust um að ekið hafi verið á kindur, annars vegar í botni Álftafjarðar og hins vegar í Súgandafirði. Tvö umferðaróhöpp urðu, umfram akstur á búfé, annars vegar á Patreksfirði og hins vegar á Ísafirði. Engin slys á vegfarendum og en nokkurt tjón á ökutækjum.
Lögreglan vill minna foreldra á að framfylgja útivistarreglunum. Eins vill lögreglan hvetja ökumenn til að fylgjast vel með veðurspá og kynna sér færð á vegum á vegagerdin.is eða í síma Vegagerðarinnar, 1777 áður en lagt er af stað í lengri ferðir.