Meginmarkmið áætlunarinnar er að koma á og viðhaldi jafnrétti og jöfnum tækifærum kvenna og karla og jafna stöðu þeirra innan embættisins. Samþætta skal jafnréttissjónarmið við alla stefnumótun, áætlanagerð og ákvarðanatöku hjá embættinu.
Gildissvið
Jafnréttisáætlun þessi tekur til allra starfsmanna, óháð starfsstöð, embættis Lögreglustjórans á Vestfjörðum í samræmi við 5. gr. laga nr. 150/2020 um jafna stöðu og jafnan rétt kynjanna.
Starfsmarkmið og leiðir
Stöðuveitingar, starfsaðstæður, starfsþjálfun og endurmenntun
Starfsmarkmið:
Unnið skal markvisst að því að jafna hlutfall kynja hjá embættinu, bæði í almennum störfum og stjórnunar- og ábyrgðarstörfum.
Gæta skal að því að sjónarmið beggja kynja komi fram í tengslum við stefnumótun og ákvarðanatöku.
Tryggt skal að að konur og karlar njóti sömu möguleika til endurmenntunar og starfsþjálfunar.
Leiðir:
Öll störf skulu auglýst laus til umsóknar nema að um sé að ræða tímabundið starf.
Í auglýsingu skulu konur jafnt sem karlar hvött til að sækja um starf. Ef tveir jafnhæfir einstaklingar sækja um auglýst starf, skal sá af því kyni sem er í minnihluta, að öllu jöfnu ganga fyrir í ráðningu.
Við úthlutun verkefna, tilfærslur í störfum og ákvarðanir á starfsaðstæðum skal þess gætt að starfsmönnum sé ekki mismunað á grundvelli kynferðis.
Gera skal símenntunaráætlun fyrir alla starfsmenn í tengslum við árleg starfsmannasamtöl. Greina skal hverjir sækja sér endur- og símenntun. Símenntunaráætlanir liggi fyrir í lok janúar ár hvert.
Launa- og kjaramál
Starfsmarkmið:
Konum og körlum skulu greidd jöfn laun og njóta sömu kjara fyrir jafnverðmæt og sambærileg störf.
Leiðir:
Kjara- og stofnanasamningar eru grundvöllur að ákvörðun launa og annarra greiðslna.
Árleg yfirferð launa með tilliti til grunnlaunaröðunar og annarra fastra greiðslna. Yfirferð skal lokið í nóvember ár hvert í tengslum við gerð fjárhagsáætlunar fyrir næstkomandi ár.
Samræming atvinnu- og fjölskyldulífs
Starfsmarkmið:
Starfsfólki skal gert kleift að samræma starfsskyldur sínar og skyldur gagnvart fjölskyldu.
Leiðir:
Skoða skal möguleika á sveigjanleika, hlutastörfum eða annarri vinnuhagræðingu í samræmi við þarfir og óskir starfsmanna (sem koma fram í starfsmannasamtali eða á öðrum tímum) eftir því sem við verður komið.
Stjórnendur skulu hvetja starfsmenn, óháð kyni, til að taka jafna ábyrgð á fjölskyldu og heimili í tengslum við fæðingarorlof og veikindi barna.
Kynbundið ofbeldi, kynferðisleg og eða kynbundin áreitni og einelti
Starfsmarkmið:
Tryggt skal að kynbundið ofbeldi, kynferðisleg og eða kynbundin áreitni svo og einelti verði ekki liðin innan embættisins.
Leiðir:
Ef upp koma mál tengd kynbundnu ofbeldi, kynferðislegri og eða kynbundinni áreitni eða einelti skal grípa til viðeigandi ráðstafana í samræmi við rgl. nr. 1009/2015 um aðgerðir gegn einelti, áreitni, og ofbeldi á vinnustöðum og verklagsreglur Ríkislögreglustjóra. Alvarlegum tilvikum skal beint til fagteymis Ríkislögreglustjóra.
Fræða skal starfsfólk í forvarnaskyni um rgl. nr. 1009/2015, 22. gr. jafnréttislaga og ákvæði almennra hegningarlaga sem fjalla um viðfangsefnið. Skal slík fræðsla fara fram a.m.k. annað hvert ár.
Framkvæma skal árlega viðhorfskönnun eða rýni á meðal starfsmanna þar sem spurt er um kynbundið ofbeldi, kynferðislega og eða kynbundna áreitni og einelti. Viðhorfskönnun eða rýni fer fram samhliða töku starfsmannasamtala í desember ár hvert.
Ábyrgð og framkvæmd jafnréttisstarfs hjá embættinu
Lögreglustjóri ber ábyrgð á framgangi jafnréttisáætlunar embættisins.
Hjá embættinu starfar jafnréttisfulltrúi. Hlutverk hans er að vinna að jafnréttismálum innan embættisins og að vera starfsfólki til aðstoðar og ráðgjafar. Jafnréttisfulltrúi gætir þess að jafnréttisáætlun sé fylgt eftir, að hún sé kynnt fyrir starfsfólki og endurskoðuð reglulega. Jafnréttisfulltrúi fylgist með jafnréttisumræðu og tekur þátt í samstarfi vegna jafnréttismála, innan og utan embættis. Hann vinnur að forvörnum tengt kynbundnu misrétti, kynferðislegri áreitni eða einelti innan embættisins og kemur eftir atvikum að úrlausn slíkra mála.
Jafnréttisáætlun þessi var samþykkt 5. janúar 2022 og tekur þegar gildi. Áætlun þessa skal endurskoða eigi síðar en í lok árs 2024.
Lögreglustjórinn á Vestfjörðum
Karl Ingi Vilbergsson, lögreglustjóri
Lögreglan á Vestfjörðum - þátttaka í orkuskiptum
Nú hefur lögreglan á Vestfjörðum tekið í notkun Teslu Y bifreið sem er staðsett á Patreksfirði. Sú bifreið hefur uppkallsnúmerið 231.
Um er að ræða nýja rafmagnsbifreið sem kemur í stað eldri lögreglubifreiðar sem knúin var með díselvél.
Fyrr á þessu ári var Tesla Y bifreið tekin í notkun á norðanverðum Vestfjörðum, n.t.t. á Ísafirði.
Áætlanir eru um að taka í notkun þriðju Tesluna sem myndi verða staðsett á Hólmavík.
Meðfylgjandi mynd var tekin á dögunum af nýju lögreglubifreiðinni á fögrum sumardegi í Vesturbyggð.
7 CommentsComment on Facebook
Er hún ekki knúin rafmótor sem knúinn er af rafmagni framleiddu með díselolíu🤔
Fjóra mánuði ársins þarf að kynda húsin með díselolíu vegna raforkuskorts hérna fyrir vestan þannig að þetta er sýndarmennska. Rafmagnið sem notað á þennan bíl sem og aðra þýðir bara meiri olía í húshitun á veturna.
Frábært, til hamingju með það😎
Þetta hlýtur að vera plat, það hefur ekki verið fagur sumardagur í Vesturbyggð í allt sumar 😂
Mér sýnist þurfa endurnýja vælubílinn líka á svæðinu,, spurning um aðra Teslu…. Til hamingju! 😎
Árekstur og afstunga.
Síðast liðinn laugardag, 22/6, á meðan á knattspyrnuleik Vestra og Vals stóð var ekið utan í bifreið sem var kyrrstæði sunnan við Kerecisvöllinn við Torfnes Ísafirði. Viðkomandi sinnti ekki skyldum vegfarenda um að nema staðar og gera ráðstafanir vegna umferðaóhappsins.
Óskar lögreglan því eftir upplýsingum eða vitnum að atburðinum. Líklegt þykir að um stærri bifreið hafi verið að ræða. Hafi henni verið bakkað aftan á bifreið sem stóð á bílastæðinu milli vallarins og Skutulsfjarðarbrautar, vallar megin.
Hafi einhver upplýsingar í fórum sínum eða þá myndefni af umræddu svæði á umræddu tímabili má sá hinn sami setja sig í samband við lögreglu annað hvort í síma 444-0400 eða með tölvupósti á netfangið 1808@logreglan.is
0 CommentsComment on Facebook
Lögreglustjórinn á Vestfjörðum vill koma á framfæri í sambandi við fyrri tilkynningu er varðar meinta alvarlega líkamsárás og tilraunar til manndráps sem átti sér stað í heimahúsi í Súðavík að kvöldi 11. júní sl. Þann 12. júní sl, var sakborningi gert að sæta vikulöngu gæsluvarðhaldi í þágu rannsóknar málsins. Rannsókn málsins hefur gengið vel og liggur fyrir nokkuð greinagóð mynd af atburðarrás.
Núna í morgun var gerð krafa til Héraðsdóms Reykjavíkur um að sakborningi verði gert að sæta áframhaldandi gæsluvarðhaldi í fjórar vikur á grundvelli almannahagsmuna. Héraðsdómur Reykjavíkur féllst á kröfu lögreglustjórans á Vestfjörðum um áframhaldandi gæsluvarðhald til 17. Júlí 2024, kl. 11:00.
0 CommentsComment on Facebook
