Frá lögreglustöðinni á Vínlandsleið 2-4 í Grafarholti (lögreglustöð 4) er sinnt verkefnum í Árbæ, Grafarholti, Grafarvogi, Norðlingaholti, Mosfellsbæ, Kjósarhreppi og á Kjalarnesi. Þar eru bæði almennt svið (sólarhringsvaktir-útköll) og rannsóknarsvið.
Opið er frá kl. 8-15 alla virka daga í móttöku/afgreiðslu á lögreglustöðinni á Vínlandsleið 2-4 í Reykjavík.
Helstu stjórnendur eru Hjördís Sigurbjartsdóttir aðstoðaryfirlögregluþjónn, Valgarður Valgarðsson aðalvarðstjóri og Hildur Rún Björnsdóttir lögreglufulltrúi. Hjördís er jafnframt stöðvarstjóri.
Íbúar á þessu svæði njóta eins og aðrir íbúar á höfuðborgarsvæðinu þjónustu öflugra rannsóknardeilda og tæknideildar lögreglunnar á höfuðborgarsvæðinu þegar kemur að rannsóknum stærri og flóknari sakamála. Þá er umferðardeild embættisins sýnileg við almennt umferðareftirlit.
Sólarhringslöggæsla er á höfuðborgarsvæðinu alla daga ársins. Ef óskað er eftir skjótri aðstoð lögreglu ber að hringja í 112.
Netföng: hjordis@lrh.is – valgardurv@lrh.is – hildur.run@lrh.is
Óskilamunadeild lögreglunnar á höfuðborgarsvæðinu staðsett á Vínlandsleið 2-4.
Opið er mánudaga til fimmtudaga frá kl. 13 – 15.30, lokað er á föstudögum. Tilkynningar um týnda muni á höfuðborgarsvæðinu má senda á netfangið: oskilamunir@lrh.is eða lostandfound@lrh.is
Lögreglan á höfuðborgarsvæðinu varar eigendur og umráðamenn ökutækja við því að skilja verðmæti eftir í bílum. Sé það óumflýjanlegt er mikilvægt að slíkir hlutir séu ekki í augsýn. Sömuleiðis er rétt að benda á mikilvægi þess að skilja bíla frekar eftir á upplýstum bílastæðum, ef þess er nokkur kostur. Þjófum finnst nefnilega fátt betra en að athafna sig í myrkrinu þar sem ekki sést til þeirra.
Reglulega er tilkynnt um innbrot í bíla í umdæminu, en þjófum er ekkert heilagt og þeir stela jafnvel jólagjöfum ef því er að skipta enda er jólagjafavertíðin á fullu þessa dagana. Því er full ástæða til að ítreka þessi varnaðarorð. Að síðustu er minnt á mikilvægi þess að skilja bíla ekki eftir ólæsta og þaðan af síður í gangi á meðan skroppið er frá.
1 CommentComment on Facebook
Gefin hefur verið út gul viðvörun fyrir höfuðborgarsvæðið og gildir hún frá kl. 18-23 í kvöld, en spáð er suðaustan 13-20 m/s og snjókomu. Búast má við skafrenningi og lélegum aksturskilyrðum, einkum í efri byggðum og á Kjalarnesi. Fólk sem er á leið til eða frá höfuðborgarsvæðinu ætti líka að hafa þetta hugfast, en mjög blint verður í snjókomu og með hvössum vindi sums staðar suðvestantil síðdegis og í kvöld ef spáin gengur eftir. Einkum frá um kl. 16 og fram undir miðnætti. Hvað verst yfir Hellisheiði, Þrengsli og Mosfellsheiði. Sömuleiðis á Kjalarnesi, eins og áður sagði, en þar er varað við leiðindaveðri og færð á milli kl. 16 og 19.
3 CommentsComment on Facebook
Skemmdarverk á Seltjarnarnesi - vitni óskast
Skemmdir voru unnar á um tíu bifreiðum á Seltjarnarnesi um miðjan síðasta mánuð, en þær voru allar kyrrstæðar í bifreiðastæðum við Austurströnd þegar verknaðurinn átti sér stað. Þar var á ferðinni skemmdarvargur sem rispaði allar bifreiðarnar með einhvers konar áhaldi - svo mikið tjón hlaust af. Svo virðist sem hinn óprúttni aðili hafi verið á ferðinni oftar en einu sinni, en bifreiðarnar, sem urðu fyrir barðinu á skemmdarvargnum, voru við Austurströnd 2-10.
Þau sem geta veitt upplýsingar um málið eru vinsamlegast beðin um að hafa samband við lögreglu í síma 444 1000, en upplýsingum má einnig koma á framfæri í tölvupósti á netfangið gudmundur.petur@lrh.is
3 CommentsComment on Facebook
Er engri myndavél beint á bílastæðin? Þetta er svo gremjulegt og rándýrt að láta gera við ææ.
Er þetta ekki dálítið seint á ferðinni hugsanlegir sjónarvottar löngu búnir að gleyma.
Hún Dóra Björt hjá borgini lýsti því yfir á samfélagsmiðlum fyrir nokkru að hana dreymdi um að lykla bíla. Er búið að tala við hana?
