Til þess að komast á lista yfir viðtakendur slíks tölvupósts þarf yfirleitt að óska eftir því.  Athugaðu hvort hugsanlegt sé að einhver sem aðgang hefur að tölvunni þinni hafi óskað eftir þessu, þ.e. skráð þitt netfang, en ef svo er ekki, þá er hugsanlegt að einhver hafi gert það í þínu nafni og þá eflaust í þeim tilgangi að koma þér í koll.   

Þá eru líka til fyrirtæki sem sérhæfa sig í að leita uppi netföng á Internetinu og senda á þau alls kyns ruslpóst með tilboðum um hvað eina sem viðskiptavinir þeirra biðja um, þ.á.m. klámefni.   Þeim sem fá slíkan póst er bent á að svara alls ekki slíkum pósti því með því eru þeir að senda tilbaka merki um að netfangið sé virkt, þ.e. að bakvið netfangið sé notandi sem fylgist með póstinum sínum.  Þar með er viðkomandi netfang orðið "söluvara" og enn meiri líkur á að fá ruslpóst sendan.    Menn ættu því alltaf að láta nægja að eyða tölvupóstinum án þess að svara honum.

Oft er tilgreint í tölvupósti af þessu tagi hvert beri að snúa sér til að þurrka netfang sitt út af listanum yfir viðtakendur.  Stundum er það með því að senda svarpóst á ákveðið netfang og stundum er það með því að fara inn á ákveðna vefsíðu og fara eftir leiðbeiningum sem þar eru gefnar.

Því miður er það oft þannig með klámsíður að það er erfiðara að losna við þær en að komast í þær.  T.d. hafa margir lent í því að skrá sig sem notendur á síðurnar. Þeir þurfa að gefa upp kreditkortanúmer til að staðfesta aldur sinn og gegn því eiga þeir að fá einhverja daga eða vikur ókeypis.  Þeir þurfa hins vegar að láta vita innan tiltekins frests ef þeir vilja ekki halda áfram og greiða áskrift.  Þegar kemur að því að láta vita getur verið búið að loka netfanginu, síðunni sem fara þarf inn á til að hætta áskrift hefur verið lokað eða færð til og menn sitja uppi með að greiða fé fyrir eitthvað sem þeir ætluðu aldrei að greiða.

Þrautarlendingin gæti verið að fá internetþjónustuna þína til að loka fyrir tölvupóst frá þessum tiltekna aðila.