Lögreglan á Vestfjörðum
Hafnarstræti 1
400 Ísafirði
Beinn sími: 444 0400
Þjónustusími allan sólarhringinn: 444 0400
Netfang: vestfirdir@logreglan.is
Með lögreglustjórn í umdæminu fer lögreglustjórinn á Vestfjörðum með aðsetur á Ísafirði.
Sveitarfélög í umdæmi lögreglustjórans á Vestfjörðum eru:
Bolungarvíkurkaupstaður, Ísafjarðarbær, Súðavíkurhreppur, Árneshreppur, Kaldrananeshreppur, Strandabyggð, Reykhólahreppur, Vesturbyggð og Tálknafjarðarhreppur.
Vestfirðir skiptust áður í fimm sýslur: Austur-Barðastrandarsýslu, Vestur-Barðastrandarsýslu, Vestur-Ísafjarðarsýslu, Norður-Ísafjarðarsýslu og Strandasýslu en í dag er venja að tala fremur um Barðastrandarsýslur, Ísafjarðarsýslur og Strandir.
Barðastrandarsýslur ná frá syðsta hluta Vestfjarðarkjálkans, frá botni Gilsfjarðar að austanverðu út á Látrabjarg að vestan og norður að Langanesi í Arnarfirði. Margar eyjar Breiðafjarðar tilheyra sýslunni.
Strandasýsla heitir eftir strandlengjunni frá Hrútafirði norður að Geirólfsnúpi.
Ísafjarðarsýslur taka yfir landsvæðið frá Langanesi í Arnarfirði allt norður í Horn og þaðan í Geirólfsnúp við sunnanverðan Reykjafjörð, þar sem sýslumörk Ísafjarðar- og Strandasýslu eru.
Þannig nær umdæmi lögreglustjórans á Vestfjörðum yfir nær allan Vestfjarðarkjálkann að undaskildum Bæjarhreppi í Strandasýslu, en hann sameinaðist Húnaþingi Vestra þann 1. janúar 2012. Umdæmið nær norður Strandir og fyrir Hornbjarg, suður fyrir Látrabjarg til Gilsfjarðar. Sýslumörk eru áfram við Vestur-Húnavatnssýslu í austri, Mýrasýslu og Dalasýslu í suðri.
Flatarmál Vestfjarða er 9.356 ferkílómetrar. Þar af eru eyjar og sker 21.5 ferkílómetrar. Til samanburðar er flatararmál Íslands, með eyjum og skerjum, 102.712 ferkílómetrar. Embættinu tilheyrir ein lengsta strandlengja landsins eða rúmlega 2000 km. Strandlengja Íslands er í heild 4970 km. Stofn- tengi- og landsvegir, auk héraðsvega að öllum byggðum bæjum sem hafa ábúendur (lögheimili) í umdæminu, eru samtals 1553 km.
Íbúar í umdæmi lögreglustjórans á Vestfjörðum 1. janúar 2014 voru 6972 og skiptust þannig eftir sveitarfélögum:
Bolungarvíkurkaupstaður 950, Ísafjarðarbær 3639, Súðavíkurhreppur 202, Árneshreppur 53, Kaldrananeshreppur 105, Strandabyggð 506, Reykhólahreppur 271, Vesturbyggð 949 og Tálknafjarðarhreppur 297.
Lögreglustöðvar eru á Ísafirði, Hólmavík og á Patreksfirði og lögreglumenn eru 20 talsins.
Þrenging á Pollgötu, Ísafirði, við Neista kl.15:30 - 17:00
Vegna framkvæmda við fráveitulagnir verður þrenging á Pollgötu við Neista eftir kl.15:30 í dag, 11. apríl. Verður vinnuvél staðsett á akrein með akstursstefnu til norðurs (að hringtorgi).
Má búast við einhverjum umferðartöfum vegna þessa en fólk er beðið að sína biðlund og velja hjáleiðir ef mögulegt er.
0 CommentsComment on Facebook
Öruggari Vestfirðir.
Samráðsfundur um aðgerðir gegn ofbeldi á Vestfjörðum verður haldinn á morgun, þriðjudaginn 9. apríl, kl: 13.00 – 16.00, í Stjórnsýsluhúsinu á Ísafirði, 9. apríl 2024.
Vinnustofan er opin öllum og þátttakendum að kostnaðarlausu. Til að áætla fjölda vegna veitinga eru þátttakendur beðnir um að skrá sig hér að neðan.
Sjá tengil inn á skráningareyðublað.
forms.office.com/e/qcQGbXSYfR?origin=lprLink
Dagskráin er svohljóðandi:
Kl. 13.00
Setning fundar. Helgi Jensson, lögreglustjórinn á Vestfjörðum
Þema 1 Aukið þverfaglegt samráð
Kl. 13.10
Tölfræði um stöðuna á Vestfjörðum. Lýðheilsuvísar fyrir börn. ofl. Kristján Óskar Ásvaldsson, forvarnafulltrúi og aðstoðarsaksóknari hjá lögreglustjóranum á Vestfjörðum.
Kl. 13.20
Hvernig getum við unnið betur saman vegna heimilisofbeldismála? Margrét Geirsdóttir sviðsstjóri velferðarsviðs Ísafjarðarbæjar, Helgi Jensson, lögreglustjórinn á Vestfjörðum, Helena Jónsdóttir, hjúkrunarfræðingur geðheilsuteymis og Magnea Hafsteindóttir,
deildarstjóri heilsugæslu og skólahjúkrunarfræðingur við Heilbrigðisstofnun Vestfjarða.
Kl. 13.35
Hvernig getum við unnið betur saman þegar kemur að einstaklingum með geðvanda og kynning á geðteymi Heilbrigðisstofnunar Vestfjarða. Sr. Fjölnir Ásbjörnsson, prestur við Vestfjarðaprófastdæmi og Thelma Björk Guðmundsdóttir, verkefnastjóri geðheilsuteymis
við Heilbrigðisstofnun Vestfjarða á Ísafirði.
Kl. 14.05
Hvernig getum við unnið betur saman vegna kynferðisbrotamála? Skúli Berg, lögreglufulltrúi hjá lögreglustjóranum á Vestfjörðum, Hrafnhildur Ólafsdóttir, hjúkrunarstjóri og Þuríður Vilmundardóttir, skurðhjúkrunarfræðingur við Heilbrigðisstofnun Vestfjarða
Kl. 14.20
Hvernig getum við unnið betur fyrir fólk af erlendum uppruna? Klaudia Karolsdóttir, lögreglumaður hjá lögreglustjóranum á Vestfjörðum.
Þema 2 Forvarnir og fræðsla vegna barna.
Kl. 14.35
Forvarnir hjá leik- og grunnskólum. Ásdís Snót Guðmundsdóttir skólastjóri Patreksskóla á Patreksfirði og Ester
Ösp Valdimarsdóttir, skólastjóri Ásgarðsskóla á Hólmavík/Skýinu.
Kl. 14.50
Forvarnir hjá framhaldsskólanum. Erna Sigrún Jónsdóttir, námsráðgjafi og forvarnarfulltrúi við
Menntaskólann á Ísafirði og Svanhvít Skjaldardóttir, deildarstjóri
framhaldsskóladeildar Fjölbrautaskóla Snæfellinga á Patreksfirði og Agnes Helga Sigurðardóttir námsráðgjafi hjá FSN.
Kl. 15.10
Forvarnir hjá frístundum/félagsmiðstöðvum. Dagný Finnbjörnsdóttir, íþrótta- og æskulýðsfulltrúi Ísafjarðabæjar.
Kl. 15.20
Forvarnir hjá lögreglunni vegna barna. Hlynur Snorrason, yfirlögregluþjónn hjá lögreglustjóranum á Vestfjörðum.
Kaffiveitingar samhliða umræðum á borðum
Kl. 15.30 Umræður á borðum: Hvaða áhersluverkefni ætti að vinna fram að næsta samráðsfundi í haust?
Kl. 16.00 Undirritun samstarfsyfirlýsingar um Öruggari Vestfirði og skipan framkvæmdateymis.
Fundarstjóri: Eygló Harðardóttir, verkefnastjóri hjá ríkislögreglustjóra
0 CommentsComment on Facebook
Páskarnir fóru að mestu vel fram á Vestfjörðum samkvæmt þeim upplýsingum sem lögregla hefur í sínum fórum.
Aðfaranótt skírdags var einstaklingur handtekinn en við leit á honum fundust fíkniefni og áhöld þeim tengd.
Þá var einstaklingur undir lögaldri inni á vínveitingastað á Ísafirði sömu nótt en honum var ekið heim enda er dvöl einstaklinga yngri en 18 ára óheimil á vínveitingastöðum eftir kl. 22 nema með forráðamönnum eða öðrum nánum aðstandendum 18 ára eða eldri.
Á föstudaginn langa barst tilkynning um bílveltu á Steingrímsfjarðarheið og kom fram að þrír væru í bifreiðinni. Sem betur fer urðu ekki teljandi slys á fólki.
Aðfaranótt laugardags var tilkynnt um slagsmál í miðbæ Ísafjarðar en þau enduðu án vandræða og eftirmála.
Aðfaranótt páskadags átti sér stað líkamsárás í miðbæ Ísafjarðar. Meintur gerandi var handtekinn og vistaður í fangageymslum en hann hafði auk þess verið til vandræða á skemmtistað í bænum skömmu áður.
Sá handtekni var sá eini sem vistaður var um páskana í fangageymslum og er það fremur jákvætt ef miðað er við síðustu ár.
Þá voru einungis þrír ökumenn kærðir fyrir of hraðan akstur frá miðvikudegi til 2. dags páska sem er einnig margfalt minna en verið hefur síðustu ár. Lögregla lítur það mjög jákvæðum augum sér í lagi þar sem mest allt eftirlit með ökuhraða fór fram meðan veður og færð voru góð.
Skemmtanahald á Vestfjörðum fór almennt vel fram þrátt fyrir fjölda fólks á svæðinu og viðburði af ýmsum stærðum og gerðum.
Þá fór tónlistarhátíðin Aldrei fór ég suður fram á Ísafirði í tuttugasta sinn. Hátíðin gekk mjög vel fyrir sig en mikill fjöldi fólks sótti hátíðina.
0 CommentsComment on Facebook
