Börn og unglingar þurfa ekki síst á tíma, stuðningi og aðhaldi foreldra að halda í desember. Áreitið er mikið og þau e.t.v. með meiri fjárráð vegna tímabundinnar vinnu. Annir foreldra eru líka miklar og því vill henda að samvera fjölskyldunnar mæti afgangi. Samvera barna og foreldra er því afar mikilvæg og á aðventunni gefast mörg tækifæri til slíkra stunda.þar sem fjölskyldan setur sjálfa sig í öndvegi, styrkir böndin, nýtur samverunnar, og býr til góðar minningar saman.

Umhyggja og hlýja frá fjölskyldum er grundvöllur velferðar barna og dregur mjög úr líkum á því að unglingar velji að fikta við að reykja, nota áfengi eða önnur vímuefni. Ekki þarf að kosta miklu til eða að útbúa mikið prógramm. Samverustundir fjölskyldunnar einar og sér eru ómetanlegt veganesti fyrir lífið.

Undanfarin ár hafa skilaboð til fjölskyldna um að verja meiri tíma saman verið áberandi, einkum í kringum atburði þegar líklegt er að unglingar neyti áfengis eða annarra vímuefna. Foreldrar hafa tekið þessum skilaboðum vel en líka unglingar sem virðast vilja verja meiri tíma með sínum nánustu. Nýjustu kannanir á reykingum og neyslu vímuefna meðal 10. bekkinga sýna líka að mjög hefur dregið úr slíku í þeim aldurshópi og að ólíklegra er að unglingar leiðist út í slíka neyslu ef foreldrar fylgjast með þeim og taka virkan þátt í lífi þeirra.

Njótum aðventunnar sem tíma fyrir fjölskylduna til að undirbúa saman komu jólanna og njóta gleði og eftirvæntingar þannig að þegar klukkurnar hringja inn jólin hafi allir lagt sitt af mörkunum. Þá verður tími til alls og fjölskyldan í stakk búin til að njóta tímans.

SAMAN – hópurinn óskar öllum fjölskyldum ánægjulegrar aðventu og gleðilegra jóla og ármóta.                                       

 F. hönd SAMAN hópsins
Hildur Björg Hafstein
Verkefnisstjóri á Lýðheilsustöð