Þegar fólk er lengi að heiman eykst hætta á innbrotum og því vill lögreglan benda á nokkur atriði sem rétt er að skoða áður en haldið er að heiman.


Gæta þarf þess að ganga tryggilega frá hurðum og gluggum og skilja ekki varalykil eftir á vafasömum stað.


Kappkosta þarf að það líti út fyrir að einhver sé heima t.a.m. með því að hafa þvott á snúru og fá nágranna til að nota bílastæðið.


Einnig er gott að skilja eftir útvarp í gangi, hæfilega hátt stillt og hafa ljós kveikt á sýnilegum stað í húsinu.


Muna verður eftir símsvaranum, að hann tilkynni ekki um fjarveru íbúa og hversu lengi þeir verða í burtu.


Það má ekki vera póstur sem auglýsir fjarveru íbúa.



Heppilegt er að koma dýrmætum hlutum eins og frímerkja- eða myntsafni, dýrum skartgripum o.þ.h. fyrir á öruggum stað, t.d. í bankahólfi.


Rétt er að gera skrá yfir aðra verðmæta hluti og jafnvel taka myndir af þeim til að eiga ef menn yrðu svo óheppnir að verða fyrir barðinu á innbrotsþjófum.

Loðinn grasblettur getur gefið vísbendingar um mannlaust hús.