Umdæmi sýslumannsins á Akureyri er Eyjafjarðarsýsla og tveir vestustu hreppar S-Þingeyjarsýslu, Svalbarðsstrandarhreppur og Grýtubakkahreppur.  Auk þess fer sýslumaðurinn á Akureyri frá 1. janúar 2007 með lögreglustjórn í umdæmi sýslumannsins í Fjallabyggð, áður Siglufjörður og Ólafsfjörður.  Vesturmörk lögregluumdæmisins fylgja þannig frá 1. janúar 2007 miðjum Tröllaskaga til sjávar að Almenningsnöfum.  Austurmörkin fylgja miðri Vaðlaheiði til sjávar út í Fjörðum. Til suðurs fylgir umdæmið hálendinu beggja vegna Eyjafjarðardala allt til Hofsjökuls. Stærð lögregluumdæmisins er 4.274 ferkílómetrar. Íbúafjöldi var þann 1. apríl 2006 23.362.

Stærstu þéttbýlisstaðirnir eru Akureyri með 16.754 íbúa, Fjallabyggð, áður Siglufjörður og Ólafsfjörður, með 2.281 íbúa og Dalvíkurbyggð með 1.937 íbúa en henni tilheyra þéttbýlin Árskógssandur og Hauganes auk fyrrum Svarfdælahrepps og Ársskógsstrandarhrepps. Önnur þéttbýli eru Grenivík austan fjarðarins og Hrafnagil í Eyjafjarðarsveit. Þá eru tvær stórar eyjar í byggð í umdæminu, Hrísey og Grímsey.

Fjöldi ferðamenna leggur leið sína til Eyjafjarðar árið um kring og þar er margt áhugavert að skoða. Á sumrin er vinsælt er að fara í Leyningshóla innst í Eyjafirði og fjölda áhugaverðra gönguleiða er finna báðum megin fjarðar og nýtur gönguleiðin frá Grenivík út Látrastönd og yfir í Fjörður vaxandi vinsælda. Þá er áhugavert að skoða sjávarþorpin út með firðinum og síðast en ekki síst eru eyjarnar, Hrísey og Grímsey, sérstaklega áhugaverðar. Akureyri er vaxandi ferðamannabær árið um kring og hefur

Vetraríþróttamiðstöðin í Hlíðarfjalli, sem er eitt besta skíðasvæði landsins, dregið til sín sívaxandi fjölda fólks. Þá er þar fjölbreytt menningar- og félagslíf, góðir veitingastaðir og fjölbreytt úrval skemmtistaða.

Í landnámu er getið um landnámsmann Ólafsfjarðar.  Í kringum árið 900 munu bræður tveir þeir Ólafur Bekkur og Héðinn synir Karls úr Bjarkey af Hálogalandi hafa siglt til Íslands og námu þeir sinn hvorn fjörðinn hlið við hlið.  Ólafur Bekkur nam Ólafsfjörð og settist að á Kvíabekk.

Saga staðarins er mótuð af fjallahringnum sem umvefur hann og návígi við sjóinn.  Ljóst er að Ólafsfjörður hefur haft upp á margt að bjóða sem síður var annars staðar.

Ólafsfjörður fékk kaupstaðaréttindi 1.janúar 1945 og varð um leið sjálfstætt lögregluembætti með bæjarfógeta.  Íbúum fór fjölgandi í Ólafsfirði fram til ársins 2002 en þá voru íbúar 1205, og hefur fólksfjöldinn staðið nokkuð í stað síðustu tvo áratugina, en síðustu árin hefur þeim fækkað örlítið.

Í Ólafsfirði er ýmis afþreyging fyrir ferðamenn t.d. golfvöllur, góð aðstaða til knattspyrnuiðkunnar, nýtt og stórt íþróttahús og mjög góð sundlaug.  Góð aðstað er fyrir skíðamenn bæði alpa- og skíðagöngu.   Þá er fjörðurinn paradís fyrir vélsleðafólk sem hefur sótt þangað í auknum mæli.

Siglufjörður er um 7 km langur með litlu undirlendi en mjög grösugur, girtur bröttum blágrýtisfjöllum á þrjá vegu. Siglufjarðarkaupstaður, nyrsti kaupstaður landsins, stendur á allstórri en lágri eyri, Þormóðseyri. Við hana er einhver besta höfn landsins frá náttúrunnar hendi. Þar fer margt saman, aðdýpi og gott skjól fyrir illviðrum og síðast en ekki síst brýtur "öldubrjóturinn kargi", Siglunes hinar miklu norðaustan haföldur áður en þær ná inn í fjörðinn.  Undirstöðuatvinna er fiskveiðar og úrvinnsla sjávarfangs.

Siglufjörður öðlaðist kaupstaðarréttindi árið 1918 og varð um leið sjálfstætt lögsagnarumdæmi. Í landsmálum og kosningum til Alþingis hefur Siglufjörður ýmist fylgt Eyfirðingum (til 1942), verið sjálfstætt kjördæmi (1942-1959) eða tilheyrt Norðurlandskjördæmi vestra ( frá 1959).  Frá 2003 tilheyrir Siglufjörður Norðausturkjördæmi, sem nær frá Almenningsnöf að Almannaskarði.

Síldarminjasafn er á Siglufirði og ýmis afþreyging fyrir ferðamenn, t.d. mjög gott skíðasvæði, gönguleiðir, golfvöllur o.fl.