Það var í nógu að snúast hjá lögreglunni í Vestmannaeyjum í vikunni sem leið og töluvert að gera aðfaranótt 1. nóvember sl. vegna hinna ýmissa mála sem upp komu er varðaði ölvunarástand gesta öldurhúsanna.

Að morgni 1. nóvember sl. var par handtekið eftir að það hafi brotið rúðu á heimili lögreglumanns, sem hafði fyrr um nóttina haft afskipt af parinu.  Ljóst var, strax eftir eignaspjöllin að þau beindust gegn þessum lögreglumanni. Við yfirheyrslur viðurkenndi parið að hafa brotið rúðuna og gaf þá ástæðu að þau hafi verið óánægð með afskipti þess lögreglumanns sem þarna býr.  Lítur lögreglan svona hegðun mjög alvarlegum augum og fer að sjálfsögðu fram á að fólk sýni heimilum lögreglumanna sömu virðingu og heimilum annarra.

Tveir þjófnaðir voru tilkynntir til lögreglu í vikunni en  í öðru tilvikinu er um að ræða þjófnað úr vösum gesta Íþróttamiðstöðvarinnar og er það mál upplýst.  Í hinu tilvikinu er um að ræða þjófnað á bjórkút sem var í bifreið sem merkt er Pizza 67.  Átti þjófnaðurinn sér stað síðdegis föstudaginn 31. október sl.  Ekki er vitað hver þarna var að verki en þeir sem einhverjar upplýsingar geta gefið eru beðnir um að hafa samband við lögreglu.

Eitt fíkniefnamál kom upp í vikunni en síðdegist sl. föstudag hafði lögreglan afskipti af tveimur ungum mönnum sem sátu í bifreið á Skansinum og höfðu verið við neyslu fíkniefna.  Þeir viðurkenndu brot sitt og telst málið upplýst.  Haldlagt var smáræði af kannabisefnum í tengslum við málið.

Einn ökumaður var stöðvaður í vikunni vegna gruns um ölvun við akstur og eru þá stútar ársins orðnir 21  en á sama tíma í fyrra voru þeir 18.  Auk þess hafa 5 ökumenn verið stöðvaðir vegna gruns um akstur undir áhrifum fíkniefna í ár,  en á sama tíma í fyrra voru þeir 2.