Lögregla hafði í vikunni afskipti af manni sem var að skjóta fugla í Gufudal norðan við Hveragerði.  Í ljós kom að maðurinn hafði skotið tvær aliendur.  Maðurinn sem hafði verið við stangveiðar í Varmá bar því við að hafa ekki vitað að endurnar væru í landi Hveragerðis né hafi hann grunað að þetta hefðu verið aliendur.  Lögreglan lagði hald á skotvopn og bráð. 

Á fimmtudagskvöld fékk lögregla tilkynningu um vélsleðaslys við Skriðutinda suðaustur af Skjaldbreið.  Ung kona sem var á vélsleða féll af honum er sleðinn lenti í eldri förum.  Konan hlaut skurð og mar á annan fótinn.  Í fyrstu var talið að hún væri fótbrotin og því var leitað eftir aðstoðar Landhelgisgæslunnar sem sendi þyrlu á staðinn og var konan flutt með henni til Reykjavíkur þar sem hún gekkst undir læknisrannsókn. 

Lögreglan á Selfossi hafði afskipti af tveimur mönnum á föstudag vegna þjófnaðar á reiðtygjum.  Við yfirheyrslu viðurkenndu mennirnir að hafa brotist inn í hesthús í Mosfellsbæ fyrir um tveimur vikum og stolið þaðan tveimur hnökkum og nokkrum beislum.  Annar mannanna sem er um þrítugt hefur nokkrum sinnum áður komið við sögu lögreglu vegna þjófnaðar.  Hann bar því við að hafa legið undir líflátshótunum ef hann gerði ekki um 15 þúsund króna skuld og til að losna undan þeim hótunum hafi hann brugðið á þetta ráð til að geta greitt skuldina.  Þess má geta að reiðtygin sem stolið var eru ný að verðmæti um 200 þúsund krónur. 

Þrír ökumenn voru kærðir fyrir ölvunarakstur um helgina og einn fyrir akstur undir áhrifum lyfja.  Lögreglan hefur verið við hraðamælingar á þjóðvegunum og  í því eftirliti voru 22 ökumenn kærðir fyrir hraðakstur.  Nokkuð hefur verið um að ökumenn hafi hafi leitað til lögreglu vegna þess að þeir höfðu fest ökutæki sín á ýmsum hliðarvegum og slóðum.  Ástæðan er að frost er að fara úr jörðu og víða mikil aurbleyta og varasamt að fara inn á vegaslóða sem eru fáfarnir.