Tveimur fjórhjólum var stolið úr gámi við Bolöldu á tímabilinu 14. til 18. maí síðastliðinn.  Á gáminum var öflugur lás sem hafði verið skorinn í sundur með skurðarskífu.  Hjólin eru af gerðinni Yamaha Grizzly 700cc, græn.  Fjórhjólin voru á stærri dekkjum en gengur og gerist. 

Um helgina var 200 til 300 lítrum af  dísilolíu stolið af vörubifreið í eigu Lýsis.  Bifreiðin stóð við Hafnarskeið í Þorlákshöfn. 

Brotist var inn í húsnæði Rauða krossins við Eyraveg á Selfossi um helgina.  Þaðan var stolið Lenovo fartölvu og Dell skjávarpa.

Lögreglan biður alla þá sem veitt geta upplýsingar um þessa þjófnaði að hafa samband í síma 480 1010.

Ökumaður vélhjóls viðbeinsbrotnaði er hann féll af vélhjóli sínu á laugardag þar sem hann ók í keppnisbraut í Bolöldu.

Fimmtán ökumenn voru kærðir fyrir hraðakstur í vikunni.  Einn var kærður fyrir akstur undir áhrifum fíkniefna og einn fyrir ölvunarakstur.  Nokkrir voru kærðir fyrir ýmiss konar umferðarlagabrot eins og t.d. fyrir að tala í farsíma í akstri.

Rannsóknardeild lögreglunnar á Selfossi vinnur að rannsókn tveggja banaslysa sem urðu í síðustu viku.