Helgin var róleg í umdæmi lögreglunnar á Selfossi. 

Á föstudag hafði lögregla afskipti af pari sem grunað var um að hafa stolið nýjum farsíma úr verslun M&M að Eyravegi 2 á Selfossi.  Lögreglumenn fundur parið stuttu síðar þar sem það var við verslun Krónunnar.  Karlmaðurinn var með símann í fórum sínum.  Maðurinn sagði símann gamlan og í hans eigu.  Síðar sagðist hann hafa fundið símann við ruslagáma hjá verslun M&M.  Þarna var um sama síma og stolið var úr versluninni.  Sama dag hafði lögregla haft afskipti af konunni eftir að hún var staðinn að því að taka bók úr versluninni fara með hana að afgreiðslukassa og sagði afgreiðslumanni að hún vildi skila bókinni og fá inneignarnótu.  Konan viðurkenndi að hafa ætlað að svíka fjármuni út úr versluninni með þessu.  Fyrr í vetur var þetta par á ferð á Selfossi og í Hveragerði þar sem það stundaði það að stela vörum og svíkja fjármuni út úr verslunum. 

Ökumaður var handtekinn á Laugarvatni um helgina eftir að hann ók, ölvaður, í gegnum girðingu við nýbyggingu gufubaðsins á Laugarvatni og hafnaði þar ofan í skurði.  Ökumaður hvarf af vettvangi en fannst skömmu síðar.  Bifreiðina tók maðurinn í óleyfi en hún var ólæst með lykli í kveikjulás á bifreiðastæði við Menntaskólann.  Viðurkenning ökumanns liggur fyrir í málinu auk þess sem vitni voru að atvikinu. 

Kona slasaðist minni háttar þegar hestur sem hún reið lenti utan í bifreið sem ekið var fram með hestinum í hesthúsahverfinu á Selfossi í síðustu viku.  Talið er að hesturinn hafi fælst þegar bifreiðinni var ekið framúr honum og knapanum og lent utan í henni með þeim afleiðingum að fótur knapans varð á milli hests og bifreiðar.  Hesturinn slasaðist á fæti við óhappið er hann rakst utan í hliðarspegil.  Konan hlaut mar á fæti og leitaði til læknis og dýralæknir saumaði skurð sem kom á fót hestins.  Lítilst háttar tjón varð á bifreiðinni. 

Milli klukkan 17:10 og 17:40 síðastliðinn fimmtudag var ekið á hægra afturhorn grárrar Mercedes Bens bifreiðar sem stóð mannlaus á bifreiðastæði framan við verslun BYKO á Selfossi.  Engar vísbendingar eru um hver hafi ekið á bifreiðina og biður lögregla þá sem veitt geta upplýsingar um málið að hringja í síma lögreglunnar 480 1010.