Í umdæmi lögreglunnar á Hvolsvelli voru 16 ökumenn stöðvaðir vegna hraðaksturs síðast liðna viku. 2 ökumenn voru stöðvaðir, grunaðir um ölvun við akstur og eru mál þeirra í rannsókn.

3 umferðaróhöpp voru tilkynnt til lögreglunnar á tímabilinu, Bílvelta var á Landvegi 26. febrúar, þar var ökumaður einn í bílnum og voru meiðsli minniháttar.

Óhapp varð við Kvísker í Öræfum þann 4. mars á milli mjólkurbíls og flutningabíls, en speglar bifreiðanna rákust saman er þeir mættust. Segja má að þarna hafi lukkan snúist þeim í vil, því ekki vantaði á nema nokkra sentimetra að bifreiðarnar myndu skella saman.

Umferðarslys var á Suðurlandsvegi, þanng 4. mars við bæinn Sólheima, skammt vestan við Hvolsvöll, en þar rákust saman fólksbifreið og sjúkrabifreið. Tveir voru í fólksbifreiðinni og slasaðist ökumaður hennar töluvert. Farþegi slapp ómeiddur. Í sjúkrabílnum voru tveir sjúkraflutningamenn, sjúklingur og einn farþegi. Sjúkraflutningsmennirnir sluppu með minniháttarmeiðsli, en farþeginn skarst á fæti. Sjúklingurinn slapp ómeiddur.

Tildrög slyssins eru þau að bifreiðunum var ekið í gagnstæða átt, en skömmu áður en þær mættust var fólksbifreiðinni skyndilega ekið fyrir sjúkrabifreiðina með áðurgreindum afleiðingum.

Lögreglan á Hvolsvelli lýsir eftir vitnum að slysinu og eru þau beðin um að hafa samband við lögregluna í síma 488 4110.

Í síðustu viku voru lögreglumenn kallaðir að heimili í Rangárþingi ytra vegna ölvunarástands og hótanna. Þar sem vitað var um skotvopn á staðnum var ákveðið að kalla eftir aðstoð sérsveitar Ríkislögreglustjóra, til að tryggja öryggi á vettvangi.

Maðurinn var handtekinn mótþróalaust og sýndi hann lögreglu fulla samvinnu og kurteisi.