Vikan var róleg í Dölum framan af en undir lok vikunnar var greinilega komin rjúpnaveiðihugur í veiðimenn og var þó nokkuð hringt og spurt um veiðilendur.  Embættið hefur ekki upplýsingar um það á takteinum nema landeigendur hafi sérstaklega tilkynnt lögreglu hvernig veiðum á þeirra jörðum sé háttað og það hafa örfáir gert. Veiðimenn eru því hvattir til að kynna sér vel eignalönd og leita leyfis hjá landeigendum. 

Vitað er til þess að veiði í landi Glerárskóga í Hvammssveit er bönnuð.  Einnig er  veiði bönnuð í landi Ólafsdals í Gilsfirði en sú jörð er í eigu ríkisins og hefur landbúnaðarráðuneytið bannað allar rjúpnaveiðar á eyðijörðum í sinni eigu.  Áður en rjúpnaveiðibannið gekk í gildi var það þannig að allir máttu veiða á þessum eyðijörðum.  Þá hafa nokkrir bændur í Suðurdölum myndað með sér hlunnindafélag og leigt út rjúpnaveiði á sínum jörðum og því óheimil öðrum en leigutaka.  Þessir jarðeigendur eiga m.a. fjalllendið í kringum þjóðveginn á Bröttubrekku.  Þessar jarðir eru Vífilsdalur, Gröf, Fellsendi, Háafell, Sauðafell, Hlíðartún, Skallhóll, Breiðabólsstaður í Sökkólfsdal, Neðri-Hundadalur og Fremri-Hundadalur.

Lögreglan í Búðardal hélt uppi eftirliti með rjúpnaveiði um helgina og var mikill fjöldi veiðimanna á veiðum og á ferðinni í gegnum umdæmið vestur á firði.  Allir þeir sem voru stöðvaðir höfðu sín mál í lagi þ.e. veiðikort og skotvopnaleyfi.  Lögreglan ítrekaði við veiðimenn að afla leyfis landeiganda til veiðanna og tóku veiðimenn vel undir það.