Til foreldra/forráðamanna leikskólabarna

Markmiðið var að kenna börnunum fáeinar umferðarreglur sem geta stuðlað að auknu öryggi þeirra í umferðinni.

Farið var yfir helstu umferðarreglurnar sem ætlaðar eru börnum. Þeim er skipt í hópa eftir aldri, þannig að þau fái fræðslu við hæfi miðað við þroska.

Að ganga yfir götu – stoppa á ganstéttinni, líta vel til beggja hliða og hlusta. Börnunum er sagt að gott sé að leiða mömmu og pabba (einhvern fullorðinn) yfir götuna. Brýnt er fyrir börnunum að hlaupa ekki yfir götuna. Börnunum er sögð saga um Lúlla löggubangsa sem hljóp yfir götuna og varð fyrir bíl.
Hvernig á að fara yfir bílastæði – Talað um bílastæði og börnin fengin til þess að finna út hvers vegna þau mega ekki hlaupa yfir bílastæðið og hvers vegna þau eigi ekki að fara á undan mömmu eða pabba.
Endurskinsmerki – Börnunum sýnd endurskinsmerki. Lögreglumaðurinn er með mikið af endurskinsmerkjum á búningnum sínum.
Bifreiðin – Sögð er saga af Lúlla löggubangsa þegar hann fer í bíl í fyrsta skipti. Hann situr að sjálfsögðu aftur í og á bílpúðanum sínum og spenntur í öryggisbelti. Lúlli losar beltið án þess að bílstjórinn viti um það. Þegar bílstjórinn þarf að bremsa mjög snögglega kastast Lúlli til í bílnum og meiðir sig á trýninu.

Hjólreiðar og hjólreiðahjálmur – Sögð er saga af Lúlla löggubangsa þegar hann fór að hjóla. Hann notaði ekki hjálm og fékk því „kúlu“ á hausinn þegar hann dattt af hjólinu. Börnunum er sagt frá því að þau megi ekki hjóla á götunni heldur eigi þau að hjóla í garðinum heima, á leikvelli, göngustíg eða á gangstétt.

Lögreglan kemur í leikskólana eftir ósk leikskólakennara og foreldrafélaga eða að eigin frumkvæði – í samráði við starfsfólk hvers leikskóla fyrir sig.

Vissuð þið að:
• Mörg börn slasast ár hvert í umferðinni.
• Með góðum öryggisbúnaði og réttri notkun hans er hægt að koma í veg fyrir mörg slys.
• Mörg börn eru úti í umferðinni án sérstaks öryggisbúnaðar sem þau ættu að nota s.s. reiðhjólahjálms, öryggisbeltis, bílstóls eða bílpúða. Best er að byrja strax að venja börnin við öryggisbúnaðinn.
• Mörg börn fá að sitja í framsæti bíls fyrir framan upplásanlegan öryggispúða en það getur verið þeim lífshættulegt.   Börn eiga að sitja í barnabílstól sem vísar aftur og börn sem eru undir 150 sm að hæð mega ekki vera í farþegasæti með öryggispúða fyrir framan sig.
• Samkvæmt umferðarlögum ber ökumaður ábyrgð á því að farþegar yngri en 15 ára noti öryggisbúnað í bíl.
• Börn sem eru lægri en 150 sm að hæð eiga að nota viðurkenndan öryggisbúnað sem er ætlaður börnum.   Börn ættu sem lengst að sitja á bílpúða með baki þar sem öryggisbelti liggja betur yfir börnin, auk þess sem hliðarárekstursvörn er í bakinu sem fylgir bílpúðanum.
• Lögreglu er heimilt að sekta ökumann ef barn er laust í bíl.
• Hafið í huga að við sjálf erum fyrirmyndir.

Í framhaldi af þessu hvetur lögreglan þig/ykkur til að heimsækja heimasíðu lögreglunnar www.rls.is/forvarnir og viðbrögð þar sem finna má ítarlegri umfjöllun um forvarnastarf lögreglunnar – svo og aðra þætti í starfi hennar.